خارج من الحظر؟.. خد كيس الزبالة معاك.

السوشيال ميديا بتفرض علينا شكل معين من النجاح والتميز.
زي مثلا لازم تكون بتعرف تعمل حاجة تتصور علشان الناس تشوفها،
او تدخل في علاقة شبه البوستات اللطيفة اللي بيطلع منها مزيكا وإنت بتـ Scroll ، علشان الناس يفضلوا يقولولكم ايه العلاقة الكلبوبة الجميلة دي.

او تروح أماكن معينة علشان الـ Check in يجيب Wow كتير.
او تقرا لناس محددين، علشان هم دول المعروفين وبيوصلوا إيحاء إنك مثقف.
او تردد أسماء نجوم السينما اليوغسلافية علشان إنت جامد جدا وعديت مرحلة هوليوود وبوليوود وكل الوود اللي في الدنيا.

ومن بداية الحظر كان فيه نغمة: إستغلال وقت الحظر لازم تعمل فيه إنجازات رهيبة زي الناس الجامدة اللي عملوا 3 ماجيستير و70 دبلومة وخلصوا الكورسات الأونلاين وأخدوا منحة في كامبريدج...
ونتيجة ده فيه ناس حاسة بالإحباط دلوقت لأنهم ماعرفوش يعملوا كل ده..

الكلام دا حط ناس كتير مننا تحت ضغط إنك تافة لو ماعملتش الحاجات دي.. سطحي لو حاولت تعمل حاجة بسيطة تفرح بيها وفضلتها على إنك تعمل حاجة منظرها عظيم الناس تصقفلك عليها.

مع إنك لو مش بتقرا من قبل كدة أكيد مش هتقرا دلوقت...
لو مافيش مجال معين عايز تدرسه فعلا او ماعندكش إحتياج دلوقت للدراسة.. مش هتاخد كورسات...
ليه بقى مكبرين الدنيا!!

لو إنت مضغوط من اللي بيحصل وزهقان وبتجيب آخرك ويمكن خايف من الأخبار والاحداث ومتلخبط،
فإنت طبيعي جدا جدا.. تخيل!!

سيبك من كل اللي فات ده والكلام الوردي الجميل وحطه في الزبالة.. وركز إنت ناوي تكمل إزاي وتعمل ايه... وافتكر بس ايه الحاجات اللي فعلا إكتشفت إنها مهمة في حياتك، والحاجات اللي كانت عاملة زحمة على الفاضي حطها في نفس الزبالة.

وخد كيس الزبالة دا إرميه بره حياتك وانت خارج.