ماليش فيها

- إنتوا يابنى فريق مالكمش لازمة .. بوابين

= إنتوا بتكسبوا بالحكام

- إنتوا لو لعبتوا وحدكم فى الملعب هتتغلبوا برضو

= إحنا النادى الملكى

- إحنا نادى القرن

الحوار دا مش بين إتنين لاعيبه .. الحوار دا بين إتنين مشجعين عادى جدا .. قرروا إنهم يخسروا بعض علشان الفريق اللى بيشجعوه.

تفتكر كام واحد من اللى بيشجعوا كورة بيعرفوا يلعبوها كويس !!

كام واحد من اللى عنده إستعداد يخسر اللى حواليه بسبب الكورة ليه فيها أساسا ولو نزلته الملعب هيفجره ؟؟

الكورة مثال بسيط على إنتماءات كتير بننتمى ليها ( بلد – دين – طايفة – عيله – لون – جنس - ..... )

عندى إستعداد أطلع دخان من ودانى لو حد قال كلمة على انتماءاتى .. ماينفعش حد يجى ناحية المجموعة اللى باحس إن لىّ قيمه لمجرد الإنتماء ليها.

انا مابقيتش أجنبى علشان سافرت أوروبا ... ولا هاروح الجنه لمجرد إنتمائى لدين معين .. ولا هابقى غنى لمجرد إن أعرف ناس أغنيا .. مابقيتش رجل أعمال أول ما إشتغلت فى شركة واحد منهم.

كل حاجة باتعصب ليها محتاج أراجع نفسى هو انا ليه متعصب قوى كده ؟؟

خايف أكتشف إن إنتمائى دا مش أفضل حاجه وما أخدتش القيمة اللى كنت مستنيها منه ؟؟ .. خايف أضطر أدور ورا قناعاتى و مسلماتى ومسلمات جدودى ؟؟ ..

كتير باخاف أنزل الملعب علشان مايعرفوش إنى ماليش فيها .. ويتفضح جهلى و أتفضح إنى قشرة وشوية كلام ومعلومات باقراها وباسمعها من أى حته لكن انا ماعنديش اختبار عملى ولا علاقة بالملاعب ولا الكورة

قبل ما نشوط فى بعض .. عايز أقضى وقت فى الملعب أتدرب واتعلم وأبذل مجهود فى التمرين علشان أشوط الكورة فى الأول وأسيب مهارتى تثبت للناس إنى بافهم ..

مش علو صوتى ولا كترة عدد المؤمنين بنفس الفريق والفكرة والدين والمبدأ .. مش علشان عندى المنبر الأقوى.

خسارة بعد كل الوقت اللى باضيعه فى حوارات ونقاشات سطحيه جاهله مافيهاش غير عصبيه و توتر .. يكتشفوا إنى ماليش فيها.