بعد فترة من
الصمت ومافيش أى حاجة باكتبها ... قررت أستغل عيد ميلادى ال 24 وأكتب لنفسى شوية
حاجات عشان أفتكرها بعد وقت.
الحاجات دى
شخصية لو مش عايز تقراها براحتك ....... ولا أقولك ، إقراها يمكن تلاقى نفسك فيها
- خلال ال
24 سنة اللى فاتوا حصلت تغيرات كتير جدا فى كل حاجة من أول شكلى لغاية أفكارى
ومبادئي ... منها اللى كان بيحصل غصب عنى لا إرادى ومنها اللى كنت بابقى قاصد
أغيره .
- أخيرا
خلصت تعليم بعد 24 سنة ... بس إكتشفت إن اللى خلصته دى دايرة التعليم الفاشلة اللى
بتطلع إنسان حافظ مالوش ملامح .... والتعليم الحقيقى هو اللى شكلنى وغيّر فى
أفكارى وإتجاهاتى وعرفنى على نفسى والناس اللى حوالىّ .
- خلال 24
سنة كان برنامج يومى و قراراتى معتمده على ظروف المدرسة والأجازات وجدول المحاضرات
ومواعيد الإمتحانات .. طول الوقت عندى ثوابت موجودة وبعدها ممكن أبقى أشوف باقى
الوقت هيتملى إزاى ...... بس دلوقت وفى أول عيد ميلاد لىّ بعد التخرج الوقت كله
بقى فاضى وكل قرار هاخده او إلتزام أو شغل أو دراسة أو .. أو ... أو ... هو دا
اللى هاكمل فيه ، فجأة بقيت انا اللى بارتبها من الألف للياء .
- 24 سنة
قابلت فيها ناس كتير وإتعاملت مع شخصيات كتير جدا وإتغربت بدل البلد إتنين ...
لغاية لما إتعلمت أدير العلاقات إزاى ..... ولأنى لسه ماقابلتش ولا إتعاملت مع كل
الناس اللى فى الدنيا فأنا لسه باتعلم .
- 24 سنة فى
مجتمعنا اللى كل حاجة فيه موروثه كفاية جدا إنك تكبر وإنت لابس طربوش جدك ... بس
قرار لبس الكاجوال .. مش محتاج مجرد ثورة على الطربوش ... محتاج أبقى فاهم فى
اللبس وأختار حاجة تليق علىّ .
- طبعا لأن
إحنا بلاد مهد الحضارات وملتقى الأديان .. فطبعا خلال 24 سنة إنت بتبقى متربى على
حاجات إنت مش عارف دى نتيجة الملتقى ولا العادات المجتمعيه ولا دى فعلا حاجة
مظبوطه دينيا ... فإتعلمت أراجع وأذاكر و أحاول أفهم أكتر .. وماعنديش أزمة أقول
انا غلطان .
- جزء كبير
من ال 24 سنة كنت مقضيهم وانا مقتنع بالنظرية الدينيه بتاعتنا إن كل ما كانت
علاقتك مع ربنا قوية إنت هتبقى إنسان زى الفل فى كل حاجة ... بس إكتشفت إن حتى
ربنا لما بيحب يطور حاجة فى فكرى فهو بيفهمنى مش بيخلينى أصلى أكتر و الموضوع يحصل
بشكل سحرى ، لو فيه حاجة نفسية بيتعامل معاها هى مش بيخلينى أقعد أكتر فى الكنيسة
فأرتاح .
- بالرغم من
الجملة المشهورة " ربنا خلق الدنيا فى 6 أيام " .. إلا إن خلال ال 24
سنة بنتعلم إنك تتطحن 7 أيام متواصل ..... وإبتديت اسأل مؤخرا " هو دا إعمالا
بمبدأ إحنا مش زى ربنا !! ولا لأننا مش فاهمين الهدف من الخلق فى 6 أيام !!!
" .
- عندنا ميل ناحية المثالية دايما ... لدرجة إننا كلنا مقتنعين إن الناس
كلها غلط وانا اللى صح .... رغم إنى واحد من الغلط بالنسبة للناس الصح وهم الصح
بتاعهم غلط عندى علشان انا دايما صح .. وكلنا الوحيدين اللى بنفهم واللى بندرك
حاجات اللى حوالينا مش مدركينها ..... لو مافهمتش الجملة دى فده أكيد لانى عميق و
بافهم حاجات إنت مش بتفهمها لأنى دايما صح J
- 24 سنة
وانا شخص متمرد وناقد وباطلع القطط الفطسانه فى أى حاجة ... طبعا إنت مستنى أقول
إنى إتغيرت وبقيت مسالم ....... بالعكس ، انا لسه زى مانا متمرد وناقد وغاوى تجميع
قطط ... بس مؤخرا إبتديت أتعلم إسلوب التمرد و فن إخراج القطط قبل ما تفطس J
فيه حاجات تانى كتير بس دول اللى عايز أفتكرهم بعدين
حاسس كأنى
باتكلم عن 42 سنة مش 24 .... بس الحقيقة إن الفترات اللى كنت مركز فيها و واعى للى
بيحصل كنت باكبر فيهم أسرع بكتير عن الأوقات اللى كنت سلبى فيها ورد فعل ومستنى حد
يأكلنى الدنيا بالمعلقه.
مبسوط بكل السنين دى بإيجابياتها وسلبياتها .. ومبسوط بالمرحلة الجديدة اللى داخل عليها
كل 24 سنة
وانا طيب
تعليقات
إرسال تعليق