البداية من هنا

مع إن كل الناس بتحتفل برأس السنة وبدايتها مع بداية شهر يناير ومع إن دا متعارف عليه فى اى حته فى العالم .. لكن فى الحقيقة البداية بتبقى فى شهر ديسمبر مش يناير

يعنى مثلا المقاله الصغنتته دى بدايتها إمتى ؟؟

مش من أول ما نزلتها ولا من أول ما كتبتها .... لكن من أول ما فكرت فيها وقررت إنى أكتبها دى كانت بدايتها الحقيقية.

كل مرة بنبتدى حاجة بتبقى بدايتها الحقيقية من أول ما فكرنا فيها .. ولأننا غالبا بنبتدى نفكر فى اللى فات وهنعمل إيه فى اللى جاى خلال شهر ديسمبر فنقدر نعتبره هو بداية السنة الحقيقية.

دايما بيقولوا إن " الأهم من الشغل التخطيط للشغل "

لما باحدد انا عايز أعمل إيه ؟؟ عايز أروح فين ؟؟ هو انا إتطورت قد إيه الفترة اللى فاتت ؟؟ إيه اللى محتاج أعمله علشان أكمل أتطور ؟؟

علشان كده محتاجين كلنا نراجع أهدافنا علشان نعرف إحنا جايين منين ورايحين على فين.

وانا بابتدى السنة بأحب اسأل نفسى سؤال كده " هو انا هابتدى السنة دى ليه ؟؟ "

إيه اللى يخلينى أفضل عايش لو ماعنديش حاجة اعيشلها و أحلام عايز أحققها وناس عايز أفضل معاهم و مجالات عايز أكتشفها وصفات عايز أطورها وسلوكيات عايز أبطلها

علشان السنة اللي جاية تكون أفضل...
محتاج أجهزلها من دلوقت