حفلة إنتحار جماعى

كلنا مقتنعين إن الشخص اللى بينتحر دا بيبقى يائس وبائس وكئيب وشايف الدنيا إسود غامق جدا قوى .. بس إيه رأيك إن فيه ناس كتير بعد ما بينتحروا بيفضلوا عايشين وبينتحروا بإرادتهم أو الإنتحار دا بيبقى نتيجة طبيعيه لإختياراتهم

إزاى ؟؟؟

- لما تقبل إنك تعيش تحت رحمة كلام الناس عنك .. إنت بتنتحر

- لما تقبل إنك تعيش و جواك صورة مشوهه عن الله إنت سمعتها من الناس .. إنت بتنتحر

- لما تقبل إنك تكتم مشاعرك الطبيعيه ناحية أى حد لمجرد إنهم فهموك إنها عيب وحرام .. إنت بتنتحر

- لما تقبل إنك تسكت وتخضع بدون نقاش أو فهم .. إنت بتنتحر

- لما تقبل تصنيف الناس طول الوقت على أى أساس أيا كان .. إنت بتنتحر

- لما تقبل فكرة إن الله عايزك طول الوقت بتجاهد بدراعك وبتحاول توصله ومافيش أى ضمان معاه وكأنه إله سادى يستلذ بمنظرك وإنت متقطع قدامه .. إنت بتنتحر

- لما تقبل إنك تعيش كاسر كل حدود وقيم ومبادئ وأخلاق .. إنت بتنتحر

- لما تقبل أى فكرة بتتقدملك شكلها جميل لمجرد إنها بتديلك صلاحيات تعمل الحاجات المكبوته واللى هتموت وتعملها بغض النظر عن كونها صح أو غلط .. إنت بتنتحر

- لما تقبل أى فكرة أو مبدأ لمجرد إنهم قالولك ربنا هو اللى قاله .. إنت بتنتحر
وحاجات تانى كتير

خلاصة الكلام

- لما تقبل إنك تكون أقل من المستوى اللى الله خلقك عليه كإنسان .. إنت بتنتحر

- لما تكون مش عارف إيه هو المستوى دا أصلا .. فإنت ميت أصلا وهتقبل كل اللى فات بسهولة

للأسف ناس كتير محصورين فى آخر نقطتين .. أوعى تكون معاهم و مشترك فى حفلة الإنتحار دى بأى طريقة من اللى فاتوا .. ولو إكتشفت إنك منهم ، إلحق إسحب إشتراكك .. 

ودور على قيمتك وسبب وجودك