أسئلة محظورة 3 - الله أم أنبيائه ورسله ؟؟

وكالعادة ... لو إنت من بتوع أستغفر الله العظيم وإيه الكفر اللى بيتقال ده أوعى تكمل قراية .. الموضوع ده للى بيشغل مخه قبل لسانه وعواطفه ومستعد يفكر فعلا

- ليه تلاقى الدنيا تقوم وماتقعدش لو حصلت إساءة لرسول الإسلام ؟؟

- ليه بتلاقى المسيحيين ممكن يتضايقوا جدا لو سمعوا حد بيجيب سيرة حد من القديسين أو الأنبياء بطريقة مش كويسة ؟؟

- ليه بتلاقى أى حد بيقدس الرسل والأنبياء والقديسين اللى فى دينه وبيتكلم عنهم أكتر من ربنا ؟؟

وقبل ما تتنرفز إنت كمان وإنت بتقرا كمل معايا واسأل نفسك الأسئلة دى وجاوب بصراحة :

- كام مرة إنت كنت السبب إنك توصل رسالة غلط عن الله اللى إنت المفروض بتكلم الناس عنه ؟؟ .. دى اساءة منك لله

- كام مرة كنت عارف إنك بتعمل حاجة غلط وكملت فيها ؟؟ .. دى اساءة منك لله

- كام مرة كنت بتقدم عبادة على السريع كأداء واجب ؟؟ .. دى اساءة منك لله

- كام مرة كنت بتقرا فى الإنجيل أو القرآن لمجرد القراية علشان يقولوا عليك واد جامد وقارى من الجلدة للجلدة ؟؟ .. دى اساءة منك لله

- كام مرة حطيت إيمانك فى الرسل والأنبياء أكتر ما حطيته فى ربنا ؟؟ .. دى إساءة منك لله

وغيرها كتير من المواقف العملية اللى بيها إنت بتسئ لله لأن كل مرة إنت بتكسر فيها تعاليم الله ووصاياه هى إساءة ليه

وفالح بس تتنفض وتتكهرب لما حد يجيب قدامك سيرة حد من الأنبياء أو الرسل أو أى حد من رموز دينك المعاصرين

دا مش تقليل من مكانة الناس دى ، لكن كل واحد عرف ربنا بجد وإتواصل معاه كان شخص عظيم .. بس دا مش معناه إنه بقى الله أو ينفع يبقى فى مكانه مساوية ليه

بدل ما نتعجب من حياة الناس دى ونفضل نعظم فيهم طول الوقت لدرجة إننا فعليا بننسى الله اللى خلاهم كده ... ينفع نوصل إحنا كمان لو عرفنا الطريق المظبوط

إقتدى بيهم ... لكن ماتعبدهمش

" اُذْكُرُوا مُرْشِدِيكُمُ الَّذِينَ كَلَّمُوكُمْ بِكَلِمَةِ اللهِ. انْظُرُوا إِلَى نِهَايَةِ سِيرَتِهِمْ فَتَمَثَّلُوا بِإِيمَانِهِمْ."
من آيات الكتاب المقدس