كيف تصبح مثقف أون لاين ؟؟

الخطوات اللى جاية دى لأى حد عايز يواكب العصر ويبقى مثقف أون لاين فى العالم الإفتراضى

1- إبتدى ب status مكتوب فيها reading الفيل الأزرق

2- بعد ما تخلصها هتكتب Status تانى هتتكلم فيها عن أحمد مراد ككاتب ودى سهل تنقلها من أى حد قبلك او اى صفحه

3- كمل قراية باقى روايات أحمد مراد (دى خطوة إختيارية لو عايز تقول إنك فاهم ومتابع كاتب معين)

4- إمسك بقى قواعد العشق الأربعين ودا طبعا مش هتكتب رأيك فى الكاتب لأنك ماتعرفوش أصلا .. إنت كل اللى هتعمله هتاخد screenshot لأى جمله مجعلصه و اب لودك وهاشتاجك وماترحمش يا معلم

5- تخلصهم تمسك فى هيبتا .. بغض النظر عن إنك مش فاهم الإسم أصلا بس باقى الناس عارفين إن دى حاجة جامده واللى بيقراها يبقى جامد .. وتعمل زى ما عملت فى قواعد العشق

6- إرجع شوية للقديم بقى وإقرا عزازيل ليوسف زيدان .. وطبعا هتنبهر بالمعلومات التاريخيه اللى فيها وهتبقى أول مرة تعرفها هتدور عليها على النت هتكتشف المشكلة اللى حصلت بين يوسف زيدان وبين الكنيسة المصرية على الكلام اللى فى الرواية ده .. وبما إنك ماعندكش وقت تقرا وتشوف اللى قالوه .. فيه بوست متجمع فيه كل اللينكات بتاعت يوسف زيدان والرد عليها ورد يوسف عليها و الرد على الرد ... المهم إنت كل اللى هتعمله إنك تشير وكأنك عارف المحتوى

7- أوعى ترد على أى كومنت بعد البوست اللى فات ده .. كل اللى هتقوله دا راجل روائى كبير وليه نظرة والكنيسة ليها نظرة .. وكل واحد حر فى رأيه

8- عايز تبقى مثقف أكتر إرجع أكتر بالزمن وهات أولاد حارتنا .. ودا مش هتقراه دا هتتصور بيه بس وإنت عامل نفسك بتقراه

9- أوعى تنسى كل يوم بالليل تتصور بفنجان القهوة جنب الكتاب .. إنت راجل مثقف والمثقف مش بيشرب نسكويك

10- طبعا البنات مش هتبتدى المشوار ده بالفيل الأزرق .. إبتدى بالأسود يليق بكِ وكملى المشوار كما سبق من غير عزازيل وأولاد حارتنا

طبعا الحاجات اللى فاتت دى عادية جدا واى حد فينا بيعملها .. بس المشكلة لما تبتدى تنتشر كموضة و تبقى هى العلامات إن الشخص دا مثقف من غير ما يبقاله رأى ولا فكر ولا هو فاهم ولا متابع أى حاجة هو مجرد بيقلد

الثقافة أوسع من قراية كام رواية على فنجان قهوة وصورة .. الثقافة فكر و إدراك

وبمناسبة الفكر إستنوا المقالة اللى جاية "كيف تصبح مفكر أون لاين ؟؟" J