أى بيت مصرى أصيل لازم يكون إستخدم نظرية "لو
ماشربتش اللبن" .. سواء مع اللبن أو طبَق الفكرة على اى حاجة تانى ... إيه بقى
النظرية دى ؟؟
النظرية دى بتقول :
عند رفض إبنك أو بنتك إنهم يشربوا
اللبن هددهم بإنك هتحرمهم من اللعبه اللى وعدتهم بيها .. او طول الوقت قولهم عن
المصايب اللى هتحصل ، زى أسنانك هتوجعك و مش هتبقى قوى ومش هتبقى حلو و هيجيلك
هشاشة عظام - طبعا إحنا ماكناش فاهمين يعنى إيه هشاشة بس حاسين إنها مصيبة - وبعدين إبتدى هات اى واحد عنده اى مشكله فى أسنانه او اى مشكله وخلاص وقولهم لو
ماشربتوش اللبن هتبقوا زى عمو فلان
طبعا ممكن نقول إن الطفل بيبقى مش مستوعب
أهمية اللبن وأكيد فى سنه ده مش هاقدر أفهمه أهميه اللبن طبيا وعلميا
لكن المشكلة لما تستخدم النظرية دى مع ناس كبيرة بتفهم
وبتفكر لمجرد إنك تتحكم فيهم وتخليهم (يشربوا الفكر) بتاعك بالعافيه
- لو سمعت للناس دى إنت هتبقى كافر وربنا هيغضب عليك
- لو سيبت الفكر بتاعنا هتبقى منشق
- لو قريت كتب الكاتب الفلانى ماشوفكش بعد كده بتعمل
فيها بتاع ربنا أبدا
- لو سمعت المزيكا دى تبقى إنسان تافه وسطحى
- لو مانفذتش اللى بنقول عليه هنطردك من وسطينا
- لو ماعملتش اللى بنعمله ربنا مش هيدخلك الجنه
- لو قولت الجملة دى تانى ماحدش فينا هيكلمك
وغيرها من الجمل اللى بنسمعها كتير فى الوسط الدينى
وبتبقى على حاجات أكبر من كده كمان .. وبنبقى مش فاهمين ليه هى كده ؟؟ ليه الناس
التانيين دول وحشين ؟؟ ليه مافيش غير المجموعة اللى انا فيها هى الصح ؟؟ ليه مافيش
غير الإسلوب ده هو اللى لازم أعيش بيه ؟؟
هل انا مقتنع باللى بأعمله وبالفكر بتاعى .. ولا انا
خايف يحصلى كل البلاوى التانية دى ؟؟
لو عايز تتبنى أى فكر او أى دين أو حتى تلحد إعمل كده ..
بس بعد ما تفهم وتتأكد إن اللى إنت ماشى فيه دا صح .. واللبن اللى هتشربه ده مفيد
فعلا مش مغشوش و ضايفين عليه ميه
الله بيحب الإنسان يبقى فاهم وبيعبده عن إقتناع مش خوف
من حاجة تانى ... مش عايش معاه علشان خايف من العيشه بعيد عنه
كلام مفيد جــــــــــــــدا
ردحذف