المتحرش برئ

ماتستغربش من العنوان .. انا عارف إنى المفروض أقول إنه مش راجل وإنه حيوان مع الإعتذار للحيوان و انه لازم يتشنق فى ميدان عام ... بس خلينى أفكر معاك بالراحة و واحدة واحدة .. وخليك معايا للآخر

مجتمعنا الجميل المحافظ الرافض للحاجات اللى مش ولابد دى ، فيه شوية حاجات متوارثه .. زى مثلا :

- إتعلمنا من اللى قبلنا إن إسم أمهاتنا حاجة عيب وأسرار عسكرية مش المفروض إن حد يعرفها

- إتعلمنا نتكهرب فى تالته إعدادى عند الدرس إياه

- إتعلمنا إننا شعب متدين ويعرف ربنا وكلنا بنتعلم إن الزنا حرام .. بس افلام البورنو إسلوب حياة والمعاكسات تفاريح والكلام (الأبيح) كوميديا

- إتعلمنا إن الست دى أنتيمه الشيطان .. كل وظيفتها إنها تغرى الراجل (دنيا وآخره) .. وتوقعه فى الرذيله اللى هو عن نفسه بيعشقها

- إتعلمنا إن البنت اللى تسرح شعرها تبقى من إياهم

- إتعودنا إن الإعلام لما بيحب يعمل حلقة سخنه بيتكلم فيها عن حاجة من إتنين يا إما الدين يا إما الجنس ، يعنى مافيش مشكله لو نعمل حلقه مع واحده مغتصبه ونفضحها أكتر ونبهدل نفسيتها أكتر ما هى متبهدله ونشحت عليها فى سبيل إننا نعمل حلقه جريئه (ودى مدرسة ريهام سعيد)

- إتعودنا إن السينما الكسبانه هى سينما المشاهد مش القصة النضيفه ولا الفكرة الجديدة

- إتعودنا إن الصحافه لازم تنزلك أخبار سخنه مولعه عليها صورة أرشيفيه ممتازة لصاحبه الخبر

- إتعودنا إن الكلام فى المواضيع دى عيب .. مع إن أقل لفظ بنسمعه يوميا بيجيب خلاصه المواضيع العيب دى

- إتعودنا إننا نشتم على اللى إغتصب واللى نشر الفيديو .. مع إن أكتر فيروس منتشر " شاهد مشهد إغتصاب هيفاء وهبى "

- إتعودنا نظيط شوية لما تحصل مصيبه لغاية لما نلاقى موضوع غيره نتلهى فيه

- إتعودنا نجيب العيب على القانون ونطالب دايما بالإعدام .. مع إننا اول ناس هنتعدم مليون مرة لوإفتكرنا كام مرة ضايقنا فيها بنت ولو حتى بنظرة

ماكتبتش الكلام ده علشان أدافع عن المتحرش ولا أقول إنه برئ .. بس مش المتحرش بس هو اللى غلطان .. لأنه طالع فى بيئه كلها غلط فى غلط ... عقوبة القتل إعدام ، بس دا ماوقفش المشكلة ولا خلى الناس تحب بعض

غيّر الحاجات اللى إتربينا عليها وإتعودنا عليها و و كونت صورة إن الست دى كائن حرام وجوده .. لدرجة إن فيه بنات كرهوا نفسهم من كتر ما صدقوا الصورة دى عن نفسهم

علّم وفهّم إن البنت دى بتكمل الولد .. وربنا خلقها مساوية ليه ، ماخلقهاش فى كوكب تانى ونقلها الأرض بعد كده

لما تغير الحاجات دى وتنضف الفكر والقلب وتقدم للناس هدف ومعنى لحياتهم ولآخرتهم أرقى من نصهم التحتانى .. إبقى إرجع وأطلب إن المتحرش يتحكم عليه بإنه يكمل حياته من غير هدوم عقابا ليه على اللى عمله