الزنا حلال

هتبحلق وتبرق زى الصورة دى وتستغفر ربك مليون مرة .. برضو هاقولك الزنا حلال

قبل ما تشتمتنى وتتهمنى بالكفر إعرف ليه الزنا حلال ؟؟

لما تبقى عايش فى بلد بيبرر للمتحرش تصرفاته بحجة إنه ( يا عينى ) البنت هى اللى إستفزته بلبسها .. ومقتنعين إن حتى لو البنت لبست وإتلفت وإتغطت وحد إتحرش بيها يبقى أكيد غلطتها .. أصل هى اللى رضيت على نفسها تنزل (كده)

* ملحوظة : تعريف كلمة "كده" فى قاموس التبرير للمتحرش بيختلف على حسب الحالة .. يعنى لو البنت سايبه شعرها وحاطة ميك اب يبقى إيه اللى نزلها "كده" ولو لابسه حجاب وبلوزة عادية ومن غير ميك اب يبقى إيه اللى ينزلها بالبلوزة  "كده" .. ولو حد هجم عليها فى بيتها يبقى إيه اللى مقعدها فى بيتها "كده"

نرجع لموضعنا .... بنفس الإسلوب والمبدأ هنقيس حاجات كتير

- إنى أقتل واحد علشان إختلفنا فى الرأى عادى مش جريمة .. أصله إستفزنى

- إنى أدوس الناس وأخبط فى العربيات اللى قدامى فى الشارع شئ بديهى .. هم إيه اللى نزلهم فى الشارع اللى انا نازل فيه

- إنى أشرب مخدرات وأبقى مدمن مش غلطتى .. غلطة التاجر اللى شغال فى الممنوع

- إنى أتفرج على فيلم سكس مش حاجة عيب ولا مضطر إنى اداريها .. دا نوع عادى من الأفلام وليه الممثلين بتوعه ، هو انا يعنى اللى قولتلهم يعملوا كده

- إنى أغتصب اى واحدة معديه فى الشارع دى مشكلتها .. ماحدش قالها تعجبنى

وبالتالى

- إنى أزنى مع أى واحدة عادى جدا وطبيعى قوى .. دى الحاجة الوحيدة اللى الإتنين متفقين عليها وماحدش بيعملها من ورا حد ولا بيضايق فيها حد  .. يبقى ليه يعتبرونا مجرمين وكفرة وبنعمل حاجة غلط

المشكلة مش مشكلة تحرش بس .. دى مشكلة مبادئ بتنهار وإسلوب جاهل ومتخلف فى العلاج وطريقة التعامل مع المشاكل .. وبعد وقت هيبقى كل حاجة عادى وليها تبرير لأنك قبلت بكده من البداية

مصمم تشتمنى بعد الكلام دا وتعتبرنى كافر ؟؟