فيه كلمات بسيطة كانوا بيحاولوا يزرعوها فينا وإحنا صغيرين بس غالبا ماكناش بنقولها غير لما بابا او ماما يقولولى " قول ... "
لما كان حد يجيبلك لعبة او شيكولاته تلاقى أول حاجة يقولهالك باباك او مامتك
" قول لعمو شكرا "
" ياللا قوله Merci يا انكل علشان يجيبلك حاجة تانى "
طبعا الجملة التانية دى وديتنا فى داهية ... لان بعد وقت وتعاملات مع مجتمع رائع مليان قيم ومبادئ .. إبتدينا نتأكد إنى لما أقول شكرا دا بيخلى التعامل رسمى لأنى لو أعرفه ومتعود عليه يبقى ليه أقوله شكرا و تعبتك والحاجات دى ، ما هو المفروض يعمل اللى عمله ( لا شكر على واجب ) .... او بنتأكد إن الموضوع زى ما كانوا بيقولولنا زمان " علشان يجيبلك حاجة تانى "
حتى فى إستخدام الكلمة دى مع ربنا بقيت مصطلح كده بيتحط فى وسط الكلام لما أحب أعبر عن سعادتى او عن إكتفائى من حاجة معينة
- الحمدلله إنك قولتلى دا انا كنت هاعك الدنيا
- يا راجل كمل أكلك ..... لا الحمدلله شبعت
بتتقال من غير تفكير او من غير ماكون قاصد معناها فعلا إنى عايز أشكر ربنا
" ياعم هو ربنا خلاص مستنى كلمة شكرا منك ؟؟ "
الإجابة : اه مستنى
لو كنت مقتنع إن الله بيحبك وبيحب يتعامل معاك تعامل شخصى .. (مش قصدى يتعامل مع الإنسان والجنس البشرى عموما لكن يتعامل معاك إنت اللى هو إنت بإسمك) .. يبقى لازم تتاكد إنه فعلا مستنى منك كلمة شكرا ، بس مش علشان يجيبلك حاجة تانية ... لكن لأن كلمة شكرا دى أبسط تعبير عن سعادتك بالشخص اللى عملك الحاجة أكتر من إن إنبساطك بالحاجة نفسها
قول شكرا لكل واحد بيعملك حاجة كويسة ... زى إعلان مجدى يعقوب :)
قول شكرا لأن اللى قدامك كان قدامه إختيار إنه مايعملكش الحاجة دى
قول شكرا لربنا لأنه لسه هيجيبلك حاجات تانى
شكرا إنك قريت الكلام ده مع إنك مش مجبر تقراه .. وشكرا مقدما لو كنت ناوى تنشره لغيرك :)
تعليقات
إرسال تعليق