اللى بيقتل مجرم .. اللى بيسرق مجرم .. اللى بيغتصب مجرم
.. اللى بيخطف مجرم .. حاجات كتير بتعتبر جريمة فى القانون .... لكن فيه جريمة
وتهمة جديدة ظهرت وهى الإلحاد
زى ما إحنا عارفين إن المختصر المفيد لتعريف الإلحاد هو
عدم الإعتراف بوجود الله .. طيب هى دى جريمة ؟؟
واحد جاى بيقولك انا مش شايف ربنا ومش مقتنع إنه موجود
وماعنديش دليل أنه موجود .. وإنت بكل إقتناعك وإيمانك بالله مش قادر تثبت وجوده ،
ويمكن تكون إنت كمان ماعندكش دليل على وجود الله غير إنك إتربيت تربية دينية زى
الفل وطلعت بتسمّع المحفوظ لكن عمرك ما عيشته
انا مش باكتب علشان ابرر للملحدين ولا علشان أشكك فى
إيمانك .. لكن لو إنت لسه ماعندكش دليل على وجود الله فى حياتك (إنت) ... ماتبصش
للملحد على إنه مجرم لكن بص لنفسك إن إنت المجرم فى حق نفسك إنك بتلغى فكرك وتحبس
روحك فى محفوظات قديمة إتربيت عليها
الإلحاد كان الحل الوحيد لناس ماشافتش الله فى ناس
بتتكلم عنه كتير وبتتفاخر بتدينها
أوعى تكون واحد من الناس دول .. الحق نفسك ودور على الله
وإتقابل معاه و ساعد اللى حواليك يتقابلوا معاه
لو شايف إن الإلحاد جريمة أوعى تكون سبب فيها
المشارك فى الجريمة مجرم برضو
تعليقات
إرسال تعليق