الجملة دى كان بيقولها كتيييييييير الفنان الكبير
عبدالله فرغلى – الله يرحمه- فى فيلم "حلق حوش" .. كان كل ما حد يقوله
حاجة يرد عليه يقوله " عيب يابنى انا تااااااااريخ " .. ودا لأنه كان
دارس تاريخ كويس قوى وحافظه بالسحتوفة (وحدة قياس لا ترى بالعين المجردة )
كلنا فخورين بالفراعنة علشان الحضارة اللى عملوها
وتقدمهم فى علوم كتير وغيره من الحاجات اللى تخليك فخور بتاريخ بلدك
المسيحيين فخورين بماضيهم
المسلمين فخورين بماضيهم
الأهلاوية فخورين بماضيهم
الزملكاوية لسه بيدوروا فى الماضى إحتمال يلاقوا حاجة
مجدى عبد الغنى فخور بالجون اللى مالوش لازمة اللى جابه
فى هولندا J
وكل واحد فينا عنده حاجة بيتشرف بيها فى تاريخه وبيحس
إنها جزء من قيمته ونتيجة وجودها الحاضر بتاعه بقى بالشكل ده ... لكن المشكلة لما
تقف الساعة عند الماضى ونفضل طول عمرنا باصين ورا و بنتفشخر باللى حصل
الفراعنة عملوا حاجات العالم بينبهر لغاية إنهاردة لما
يشوفها .. و بيتنح لما يتفرج علينا وإحنا بنهدمها .. عايشين طول عمرنا بنتفشخر إن كان عندنا ناس عملوا حضارة
.. بس إحنا بنعمل إيه ؟؟؟
- الماضى مش كفاية إنه يخلى الحاضر أحسن وأفضل حتى لو كان
ماشى مشرف
- حلو إنك تتعلم من الماضى والتاريخ وتفتخر بيه وتحافظ
عليه ... لكن أوعى تتحبس جواه
- خد خطوات عمليه وسيب للى بعدك بداية يكمل عليها مش مجرد
أحلام وشعارات كلها مربوطة فى الماضى
- إنت تاريخ اللى هيجى بعدك .. إشتغل من دلوقت إنك تسيبله
حاجة تنفعه وتضيف قيمة ليه
خليك تاريخ مشرف
تعليقات
إرسال تعليق