انا شوفت الموت بعينى

- حمدلله على سلامتك .. هو إيه اللى حصلك ؟؟

- أسكت يا جدع .. دا أنا شوفت الموت بعينى

جملة بنسمعها كتير من الناس اللى بتطلع سليمة من حوادث او يكونوا على وشك إنهم يعملوا حادثة ويروحوا فيها .. او واحد يكون عنده حد قريبه حارب فى 73 ويقعد يحكيلوا عن اللى حصل معاه فى الحرب .. او يكون نزل أى مظاهرة سلمية بعد 25 يناير بس تكون سلمية بالأسلحة :)

بس تخيل إن مش دول بس اللى شافوا الموت بعنيهم .. لكن كل واحد فينا شاف الموت بعينيه

شوفته لما حد من قرايبك او صديق عمرك او جيرانك او أى حد تعرفه مات فجأة بطريقة طبيعية او حادثة

شوفته لأنك عرفت وفهمت من الناس دى كلها إن الموت هو حدث بيحصل فجأة ومش بيتكرر ومش بينفع الشخص دا يرجع يحكيلك عنه ويقولك " انا لما كنت ميت ... "

لأنه خلاص مش موجود ، مش بيسمع ولا يتكلم ولا يحس ويتفاعل مع اى حاجة ، مش بيصحى الصبح يشوف هيعمل إيه إنهاردة زى ما كان متعود .. ماعندوش أى برنامج يومى ولا أى حاجة ، لأنه ميت

وللأسف كتير مننا بيشوف الموت كل يوم بس بطريقة مختلفة عن اللى فاتوا ... تقدر تقول إنه مش بس بيشوفه لكن بيعيشه

بيعيشه لأنه عايش نفس الحالة ... مش بيتأثر بأى حاجة حواليه ، ماعندوش اى حاجة يعملها ولا أى هدف ولا أى معنى لحياته .. هو مجرد جثة زى ما هيحطوه هيبقى موجود

مافيش غير مجموعة واحدة من الناس تقدر تسمع منهم جملة " أنا لما كنت ميت ... "

الناس دى فهموا هم ليه موجودين هنا .. وإيه دورهم فى زحمة البشر المخلوقين دول .. ليه موجودين هنا ودلوقت وبالإمكانيات والظروف دى ، عايزين يعملوا إيه وليه وإزاى وإمتى

أنشطة حياتهم ممكن تكون شبه حياة أى حد بس محتواها مختلف وعلشان كده تأثيرها مختلف ... الناس دول شافوا الموت بعنيهم وكانوا جثث .. ورجعوا يحكوا حكاية إنقاذهم

وكل واحد فينا ليه فرصة إن يبقاله حكاية إنقاذ خاصة بيه

دور على الحياة وأصلها وجوهرها

و ساعتها هتحكى لاى حد ميت إزاى " شوفت الموت بعينيك " و إزاى إتكتبلك عمر جديد