شيزوفرنيا الدين

مرض الشيزوفرنيا او الفصام معروف لأغلبنا واللى مش عارف عنه كتير ممكن يعرف أكتر من هنـــــــا

لكن موضوعنا إنهاردة مش المرض ده من الناحية النفسية لكن من الناحية الدينية !!!

الموضوع وما فيه إن من كتر إستخدام الدين فى كل حاجة وبأى إسلوب ولأى هدف .. خلى ناس كتير يجيلها شيزوفرنيا الدين ،وخصوصا اللى بيسلموا دماغهم لأى حد يحركهم بإسم الدين ... يعنى تلاقيهم مقتنعين بفكرتين عكس بعض (وغالبا هم ولا مقتنعين ولا فاهمين أصلا) وبيعملوا حاجات عكس بعض برضو .. وبيقولوا كلام متضارب ... كل حاجة عندهم موجودة وعكسها

من غير ما نطول فى الشرح هاقول كام نقطة بقيوا علامات على إصابة الشخص المتدين بمرض شيزوفرنيا الدين

1- هتلاقيه بيحب جدا أغنية شريك الوطن ونسيج واحد .. وعند الإختيار بيختار نفسه ويقطع النسيج ويفض الشركة

2- هتلاقيه مؤمن جدا إن الإنسانية أولا وفوق كل شئ ، ولو قولتله إقتل بإسم الدين هيقتل

3- هتلاقيه بيقول لا للعنف بس وهو ماسك فى إيده الخرزانة

4- هتلاقيه مقتنع إن الأديان السماوية تلاتة ( يهودية ومسيحية وإسلام ) .. بس فى نفس الوقت مقتنع إن ديانته بس هى اللى صح والباقى كفرة .. امال إزاى سماويين ؟؟

5- هتلاقيه بينادى بالسلام ( الإجبارى ) والهدوء (بقطع اللسان وتسكيت المعترض) والمحبة (الظاهرية) وقبول الآخر (فى حالة لما يبقى مش آخر لكن يبقى زيى بالظبط) والحرية (فى نطاق ضيق قوى يحددهولك هو)

6- هتلاقيه بيتقبل الرأى الآخر عادى جدا وبيسمع ، بس مش بيفهم ... وغالبا لو رد بيرد فى حته تانى خااااااااااالص

7- هتلاقيه دايما ينتقد المضاد ليه (أكيد مش قصدى أوربا) ومع ذلك تلاقيه أول واحد يترمى فى حضنها (برضو ماقصدش الهجرة لأمريكا خالص)

8- هتلاقيه بيأكد على أهمية الإنفتاح على الآراء المضادة ومع ذلك هتلاقيه جاهل ومايعرفش غير الكلمتين اللى بيقولوهمله ال " .... "

9- هتلاقيه إنسان طيب ويحب يساعد كل الناس ماعدا الكفرة اللى من الأديان التانية

10- هتلاقيه دايما بشوش ومبتسم وهادى وبيحب يسمع اراء الآخرين .. بس لما بيسمعها عنيه بتبرق وصوته بيحشرج (إيه الألفاظ الغريبة دى) وودانه تطلع دخان ويتقلب للرجل الأخضر

11- هتلاقيه دايما بيحب يتكلم عن ربنا الغفور المحب ، بس فى نفس الوقت بيعبد الله علشان خايف منه ومن عقابه لأن الله بالنسبة له واقفله على الواحدة

12- هتلاقيه بيتكلم عن ربنا كتير .. بس عمره ما إتكلم معاه

كفاية كده المرة دى ونبقى نكمل مرة تانى :) .. وإنتوا أكيد بتشوفوهم و عندكم حاجات أكتر ممكن تضيفوها .. أصل مرضى الفصام دول بقيوا فى كل حته دلوقت

خلاصة الكلام ..

خلى عندك رأى وفكر وإتجاه .. أوعى تبقى جاهل او تاخد أفكارك من جهة واحدة بس ... شوف كل واحد بيقول إيه وليه وإنت محايد ولما تتبنى فكر مش عيب إنك تدافع عنه لكن العيب فى طريقة دفاعك عنه

خليك إنسان واحد مش إتنين جوه بعض