هل الجهاد طريق أم طريقة ؟؟

وكالمعتاد لازم أقول لو إنت من بتوع أستغفر الله العظيم وإيه الكفر ده .. حاول ماتدخلش هنا تانى علشان تعبت من كتابة الجملة دى :)

فيه ناس قالت بما إن الجهاد مذكر يبقى طريق .. لكن لو جهاد بتاعت وإسلاماه اللى سلامة تعبنا وهو بيدور عليها تبقى مؤنث فيبقى الجهاد طريقة

تعالوا بقى نتكلم جد شوية فى الموضوع اللى هيضايق ناس كتير ده

زمان كنت باسمع كلمة جهاد كتير .. و كل مرة كنت باسمعها كنت باكرهها أكتر ، ليه بقى ؟؟؟

لما كانوا المسيحيين يقولوها كانت تبقى مرتبطة بالجهاد ضد الخطية والحاجات اللى بتزعل ربنا اللى انا عايز أبطلها .. وإنى لازم أجاهد ضد نفسى واحاول أظبطها وأخلينى كويس وبتاع ربنا .. بس مشكلتى إنى عمرى ما جربت أعمل حاجة من نفسى ونفعت .. وكنت بارجع بعد فترة لنفس الحاجات اللى بتزعل ربنا وماكنتش عارف أتصلح حتى بإستخدام الطرق المساعدة .... وكنت دايما أسمع كلمة "أدينا بنجاهد" من ناس كتير بس بعد وقت مافيش أى تقدم فى أى حاجة

ولما كانوا بيقولوها المسلمين كانت دايما بتبقى مرتبطة بالجهاد ضد الكفار والناس اللى ضد الله لغاية لما يرجعوا عن اللى هم فيه ويهتدوا ويعرفوا ربنا .. وكانت مشكلتى مع المفهوم ده ببساطة تتلخص فى إن ربنا بيحب كل الناس حتى الكفرة فإزاى فى نفس الوقت يبعت حد يجبر الكافر على إنه يبقى كويس ؟؟ ... حتى لو مرحلة الإجبار دى مرحلة متأخرة بعد النصيحة ... عمر ما ربنا هيستخدم إسلوب العنف او الإجبار فى إنك تعبده

لو انا مش عايز أعبد ربنا مش هاعبده حتى لو الدنيا إتقلبت .. ولو هاعبده هيبقى عن خوف مش عن حب وساعتها ماتبقاش عبادة أصلا

دول أكتر فكرتين عن كلمة جهاد موجودين فى مجتمعنا ... لكن إعتراضى على كلمة جهاد فضل معايا لغاية لما قريت كتاب لشخص أقرب للصوفيه ومن وقتها وغيرت فكرتى عن الجهاد تماما

الجهاد مش إنى أجاهد ضد الغلط او ضد اللى بيغلط .. لكن الجهاد هو إنى ادورعلى ربنا وأعرف أتواصل معاه وأحبه وأعبده عن إقتناع ويبقى لى علاقة شخصية معاه بتغيرنى للأفضل بتخلينى مؤثر فى حياة الناس .. مش بعد سنين من الجهاد أكتشف إنى لسه باجاهد ومافيش أى تقدم فى حياتى

من الآخر ...

الجهاد مش طريقة أثبت بيها إنى من أتباع الله ولا أكسب بيها حسنات ولا خلطة سحرية من شوية حاجات بأعملها بشكل روتينى جاف هتخلينى كويس

الجهاد طريق شخصى جدا بامشى فيه مع ربنا علشان أحبه علشان أعبده علشان أعرفه أكتر فحياتى كلها بتتظبط أوتوماتيك