التراشق بالإيمان

لما إتنين بيشتموا بعض بيقولوا عليها فى الفصحى " تراشق بالألفاظ" .. لكن الموضة دلوقت بقيت " تراشق بالإيمان "

يعنى إيه ؟؟؟ !!

- يعنى كل ما تختلف مع حد تبدأ تدخل الدين فى الموضوع .. كوسيلة لقفل النقاش وإحراج اللى قدامك ( ماهو أكيد مش هيعترض على كلام ربنا بقى )

- يعنى معيار التعامل مع بعض يبقى علاقتنا بربنا ... الراجل ده بيصلى ويصوم يبقى أكيد الراجل دا شخصيته كويسة مع إنه ممكن يكون خاربها من ورا الناس

- يعنى الرأى الأصح دايما يبقى مع اللى مكانته الدينية أعلى ... فتسمع كتير جملة يعنى إنت هتفهم أكتر من الشيخ الفلانى ولا من القسيس العلانى ... وكأن المنصب الدينى بيخليهم بقيوا فجأة بقدرة قادر فاهمين كل حاجة ويقدروا يتكلموا فى أى موضوع ودايما يبقوا صح 

- يعنى لو إنت بتاع ربنا ( بالمقاييس بتاعتى أنا ) يبقى إنت كده إنسان موثوق فيك فى كل حاجة بعد كده .. لكن لو مش مطابق للشروط الشخصية للعلاقة مع ربنا .. تبقى إنسان مش على مستوى الحديث وماينفعش أكلمك

- يعنى أصنف الإنسان اللى قدامى بناء على دينه و جوه الدين الواحد أصنفه بناء على طايفته

- يعنى لو عايز أخلى الناس تحتقر أى حد .. أسرب كلام إنه واد كافر وزندييييييييييييق :)

الفكرة ببساطة ..

إيمانى وعلاقتى بربنا هى حاجة شخصية .. ومش هى المقياس إنى كويس ولا وحش .. ياما ملحدين قدموا حاجات للإنسانية مفيدة جدا .. لو إنت لسه بتتعامل مع اللى قدامك بناء على دينه وعلى طايفته وعلى معتقداته الدينية يبقى سامحنى إنت عندك خلل فى التواصل مع اللى حواليك

الله خلق اللى حواليك بشر زيك بالظبط بس مختلفين فى كل حاجة مش كلهم مسيحيين ولا مسلمين ولا بوذيين ولا ملحدين علشان تجمع اللى شبهك وترفض المختلف

لما تتواصل إتواصل مع اللى قدامك كبنى آدم ، ولما تتفق وتختلف إتفق وإختلف مع أفكاره

وكفاية خناقات وصراعات ومقاييس مبنية بس على الخلفية الدينية ... بإختصار كفاية جهل وغباء