بُص العصفورة

بُص العصفورة هى أول إشتغالة تقريبا بيتعلمها الطفل المصرى علشان يعملها فى اصحابه

لما كنا صغيرين كنا بنستمتع وإحنا بنقول لبعض "عليك واحد إنت والحمار واحد" وبنبقى حاسين إن ده قمة الذكاء إنى قلت لواحد بُص العصفورة وهو شرب المقلب.

الغريب بقى إن الإشتغالة دى رجعت تانى بقوة بس مش بين الأطفال لكن بين الكبار .. وبقيت تقريبا الرد الرسمى على اى سؤال بيتسئل فى البلد زى مثلا :

- هو مش الريس قال إن دم الشهدا فى رقبته ؟؟ عملهم إيه ؟؟ .... بُص العصفورة

- هو إزاى الريس بيقول كل حاجة ويرجع فيها كده ؟؟ .... بُص العصفورة

- هو مش المفروض إننا فى عصر حرية التعبير وعدم قصف الأقلام ؟؟ .... بُص العصفورة

- هو ليه مافيش مشاكل بتتحل بل العكس الدنيا بتتعقد ؟؟ .... بُص العصفورة

- هو ليه كل ما الكبير يحنجر بالحنجرة وأتباعه يهيجوا وتحصل مشكلة يخلع هو ؟؟ .... بُص العصفورة

- طيب ليه هم مصدقين إنه كبير فعلا ؟؟ .... بُص العصفورة

- طيب إزاى الناس بتصدق الكدب اللى بيتقال كل يوم ده ؟؟ .... بُص العصفورة

- أخبار محاكمة النظام السابق إيه ؟؟ .... بُص العصفورة

- أخبار العيش والجاز إيه ؟؟ .... بُص العصفورة

- أخبار المجلس العسكرى اللى حنجرتوا ضده إيه ؟؟ .... بُص العصفورة

- بالنسبة حضرتك إن فيه مصايب بتحصل فى البلد وماحدش بيسأل فيها ؟؟ .... بُص العصفورة

وغيرها كتير من الأسئلة اللى مش بس فى دماغى لوحدى لكن فى دماغ شباب كتير ومش بنلاقى إجابة غير .... بُص العصفورة

طبعا تقدر تشيل "بُص العصفورة" وتحط مكانها كل الإجابات والتبريرات اللى بنسمعها كل يوم اللى مالهاش أى معنى ولا أى أساس .. ومع ذلك فيه ناس ينطبق عليها جملة " عليك واحد ... "

هيجيلى واحد ذكى بعد كل الكلام ده ويقولى عايز تقول إيه برضو أو توصل لإيه ؟؟

- بُص العصفورة :)