كشف نظر

المقالة دى للى نظرهم ضعيف بس زى حالاتى .. أما بقى الناس اللى نظرهم 6/6 دول ربنا يزيدكم كمان وكمان انا مش باحقد عليهم ولا حاجة

لما أقعد من قدام أشوف زى الفل ، أرجع ورا شوية الاقى نفسى مش شايف .. قولت إحتمال المكان بعيد أو الأستاذ خطه صغير ... بس لقيت باقى أصحابى فى الحصة شايفين كويس من غير ما يضطروا يبذلوا مجهود فى التركيز زيى ، وقررت أكشف على نظرى وعملت أول نضارة فى حياتى و أنا فى ثانوية عامة (بس نظرى ماكنش بيضعف من المذاكرة لاسمح الله :) ) .. كده بقى تمام ورجعت أشوف والألوان بقيت زاهية والرؤية واضحة وزى الفل
لكن بعديها بسنتين حسيت بنفس المشكلة تانى .. ولما عملت كشف جديد إكتشفت إنى محتاج نضارة جديدةيمكن مش كل الناس محتاجين النضارات اللى بأحكى عليها دى .. بس كلنا محتاجين نشوف

نشوف معنى للعيشة دى .. ماتبقاش ضبابنشوف هدف واضح قدام عنينا نتحركلهنشوف صورة أحلامنا واضحة علشان نحققها مظبوطنشوف نفسنا على حقيقتها متهيألى كلنا محتاجين نشوف الحاجات دى بوضوح وإلا هنتوه وهنعيش حياة كلها تخبيط والرؤية صعبة ومحتاجة مجهود علشان نحدد الملامحفينا ناس شايفنها صح ولما إبتدت الحياة تتوه منهم لحقوا نفسهم بنضارة علشان يرجعوا الرؤية الواضحة تانى

ياترى إنت نظرك 6/6 وعارف تشوف بوضوح ولا الرؤية إبتدت تتهز

ومحتاج كشف نظر ؟؟