كيس فشار بجنيه

المرة دى هاحكيلكم قصة حصلت معايا فعلا من فترة وإفتكرتها وانا فى العيد ... مش هاعلق عليها خالص .. وكل واحد يفهمها بطريقته

كنا زهقانين جدا جدا من القعدة فى البيت وماعندناش حاجة نعملها والدنيا كانت برد بس قررنا ننزل نتمشى شوية على كورنيش المنيا الجميل (مش قوى يعنى)

وإحنا ماشيين إبتديت أحكى مع صاحبى المهتم جدا بمجال التصوير والميديا عن المصورين اللى كتروا جدا اليومين دول وكل واحد بيجيب كاميرا ويبقى om ali photographer ... سألته عن أسعار الناس الكبيرة اللى بنسمع عنها .. لقيته بيقولى فيه ناس بتاخد 10 فى الليلة وفيه ناس بتوصل ل 30 وعلى حسب بقى

قطعت كلامنا ريحة فشار جامدة ولقيت مناخيرى قلبت على مناخير كلب بوليسى بتدور على الريحة .. ولقينا عربية فشار موجودة على الرصيف وقاعد قدامها فى البرد راجل كبير فى السن مش أقل من 55 او 60 سنة بيحاول يدعك إيديه فى بعض علشان يتدفى .. وجنبيه حفيدته بنوتة صغيورة بتلعب حواليه ، روحناله  وأول ما لمح فى عنينا الشوق للفشار قام بسرعة وتحفز و قالى : "إتفضل يا بيه"  قولتله عايز كيس .. بعد ما عمله سألته عن السعر قالى الكيس بجنيه

بعد ما مشينا لفت نظرى إن فيه ناس بتاخد 30 فى الليلة ... وفيه واحد قاعد مع حفيدته فى عز البرد مستنى يبيع

كيس فشار بجنيه !!!