Puzzle

عمرك فكرت إنك ممكن تكون جزء من لعبة كبيرة .. ومش بيبقى ليك شكل ولا معنى غير فى وسط ناس مالهمش شكل ولا معنى برضو غير لما بتبقى معاهم ؟؟؟

كلنا وإحنا صغيرين كان عندنا اللعبة اللى بتتحدانا إننا نكونها من مجموعة قطع مالهاش أى معنى وهى لوحدها ولما تتجمع صح وبترتيب معين تكون الصورة المظبوطة

وكان كل هدفها إنها تعملنا التفكير والتخيل وإنى أحاول أعرف أنسب قطعة تتحط فى المكان المظبوط علشان أقدر أكون الصورة

لكن عمرنا ما فكرنا إنها قطع البازل دى ممكن تكون انا وإنت وإنتى

الوقت اللى فات كنت واخد ركن مع نفسى وبأعيد تفكير فى كذا حاجة والدنيا كانت مدربكة معايا .. لكن فى وسط الزحمة دى إبتديت أكتشف إنى مش وحدى وماينفعش أكون وحدى أبدا

اللى فهمته إن الله خلقنى جزء من بازل كبير علشان أكون جزء من صورة جميلة هو راسمها .. لو قررت إنى أكون لوحدى هابقى مجرد قطعة مش مرتاح ودايما محتاج قطع تانى تكملنى وأكملها علشان نكمل كلنا مع بعض الصورة الكبيرة دى

الله خلقك إنت كمان علشان تكون جزء من puzzle جميل ...

- ياترى إنت عارف مكانك المظبوط فين ؟؟ ولا إنت لسه عايش لوحدك او راكب غلط وعامل تشويش فى الصورة ؟؟

- ياترى إنت عايش بتأثر وتتأثر باللى حواليك إيجابيا ؟؟ ولا إنت عايش بتحاول تركب مع أى قطعة والسلام حتى لو راكب غلط ؟؟

أوعى تعيش وحدك وتنسى دورك فى ال Puzzle