يوم 26 / 8 / 2012
كملت 21 سنة ووصلت لسن الرشد .. إكتشفت إنه سن بيستناه ناس كتير وفى عيد
ميلادى اتسألت سؤال غريب : إيه إحساسك بعد ما كملت 21 سنة ؟؟ وإيه أول حاجة ناوى
تعملها ؟؟
لما فكرت لقيت إن مافيش أى إحساس مختلف ، يوم عادى زى أى
يوم .. وبالنسبة للى ناوى أعمله هو نفسه اللى كنت ناوى عليه يوم 25 ، أكيد ماختلفش
بين يوم وليلة
بس لما قعدت أفكر فى البيت مع نفسى فى السؤال ده إكتشفت
حاجة خطيرة .. هو إن فيه ناس مستنيين يوصلوا 21 سنة علشان يبدأوا يفكروا ويخططوا
لحياتهم وياخدوا قرارات مهمة بإعتبارهم بقيوا راشدين ، وكأن اليوم دا يوم سحرى فى
حياتهم بيتحولوا فيه من ناس عاديين لناس مش عاديين ويقدروا ياخدوا قرارات ويخططوا
ويحلموا لبكرة
بس الأخطر إن فيه ناس عدت السن دا من بدرى ولسه ما عملوش
أى حاجة فى حياتهم
سؤالى ببساطة لكل واحد قاعد بيقرا الكلام دا دلوقت ....
لو إنت تحت ال 21 : ياترى إنت لسه مستنى توصل لسن الرشد
علشان تبقى ملك نفسك وتبدأ تفكر إزاى هتكمل حياتك وهتعمل إيه وتبتدى تحلم وتفكر
وتبص لبكرة ؟؟؟
لو إنت فوق ال 21 : أخبار أحلامك إيه ،أخبار هدفك فى
حياتك إيه .. موجودين ؟؟ ولا الموضوع بالنسبة لك مش فارق ؟؟؟
أوعى تستنى سن معين تبتدى تفكر وتحلم ببكرة بتاعك ..
أوعى تخلى الأيام هى اللى تتحكم فيك لكن إتحكم إنت فى أيامك وخليها أحلى
تعليقات
إرسال تعليق