حنجرة سلف

المرة دى الكلام كتير لكن على قد ما قدرت إختصرته .. يمكن المرة دى تكون لهجته صعبة لكن دا اللى جوايا .. الكلام المرة دى لكل واحد عنده حنجره

فى الكام يوم اللى فاتوا شوفت كام صورة لأنجيلينا جولى منتشرين على الفيس بوك ومكتوب تحتيهم تعليقات مختلفة زى " فى الوقت اللى أنجيلينا جولى كانت بتزور اللاجئين السوريين يسرا كانت بتغنى إنتى يا بت يا موزة " ... او " شهر رمضان بالنسبة لكم مسلسلات أما الكفرة دول هم اللى بيساعدوا أطفالكم " .. وغيرها من التعليقات

فيه حاجات منها عنصرى موجه للمسلمين كتأنيب للضمير وإحراج كل اللى بيدعوا إن الغرب دول كفرة وعالم زبالة ، وفيه منها اللى بيخاطب العرب عموما مسلمين ومسيحيين وعايز يقولهم سايبين إخواتكم العرب متبهدلين وإنتوا بتتابعوا المسلسلات

 

لكن عايز أقول إنى انا عن نفسى إتكسفت من نفسى جدا لما لقيت فيه ناس ليهم مكانتهم وليهم وضعهم فى بلادهم يسيبوا البلد بتاعتهم ومن غير بروباجندا و يروحوا بلد فيها حرب ومش أمان علشان يساعدوا الأيتام والعائلات اللى سابت أماكنهم من الحرب .. وإحنا بقى (حدث ولا حرج) ، لازم المذيع من دول يطلع ويعمل لقاء مع العيلة اللى ساعدها علشان يتكلموا عن قد إيه هم كانوا ضايعين والمذيع الشهم الفظيع هو والبرنامج بتاعه إنتشلوهم من الفقر بتاعهم .. علشان يطلع فى آخر الحلقة ويقول إتبرعوا يا أهل الخير علشان البرنامج بتاعنا نفسه يعمل خير
( إسلوب شحاته رخيص)

ونموت فى الزيطة وإننا نعمل عمل خير على الملا .. لازم كل الناس تعرف إننا بنعمل خير وإننا كويسين (بحجة إنى نفسى الناس تشارك معايا)

 

طيب إحنا بنعمل إيه ؟؟ فين إيجابيتنا ؟؟ فين الرحمة اللى عمالين ننادى بيها فى الكنايس والجوامع ؟؟

كلها مجموعة حناجر وبتسلم بعض .. يطلع واحد يحنجر بحنجرته شوية ويسلم الراية للى بعده

حنجرة كل إهتمامها لفت الانظار عن طريق المواضيع الساخنة (يترك الفهم للقارئ) وطبعا علشان الحنجرة تبقى معتمدة لازم تقول كام آية قرآنية على كام آيه من الإنجيل .. علشان ماحدش يعترض على كلام ربنا .... وحنجرة تسلم حنجرة ونكتشف فى الآخر إننا بنتكلم عن المحتاجين لكن عمرنا ما شوفناهم ولا قربنا منهم .. بنناقش قضية العشوائيات لكن عمرنا ما دخلناها علشان خايفين على موبايلاتنا الغالية لتتسرق .. بنتكلم عن العفة والطهارة وإحنا لسه من أعلى الدول فى تصفح المواقع الإباحية و من أكتر الدول اللى فيها تحرش جنسى وحالات إغتصاب وبنحكى فى مين الغلطان الولد ولا البنت .. بنتكلم عن المساواة مع إحتفاظ كل شخص بمناخيره اللى فى السما .. بنناقش التعصب الدينى وإحنا أساس الفتنة .. وغيرها من الحاجات اللى مش بنعمل فيها حاجة غير إننا نتكلم ونناقش

وبعد ما نشيب ونعجز ونبقى خلاص بنودع ، نكتشف إننا ضيعنا عمرنا فى حنجرة سلف من اللى قبلنا