الوتر الحساس

الوتر الحساس دى كلمة بتتقال على الحاجة اللى لو جيت ناحيتها سهل قوى إنك تتحكم فى اللى قدامك

يعنى مثلا لو لقيت واحد جعان وقولتله هأكلك بس إعملى حاجة معينة هيعملهالك طبعا علشان إنت لعبت على الوتر الحساس عنده وهو الجوع ... وقيس على كده كتير

طبعا شعبنا العظيم بعد ما إتحكم من أوركسترا لمدة طويلة بقيت حياته كلها أوتار حساسة ( وتر الجوع ، وتر المرض ، وتر التعليم ، وتر الجنس ، وتر الوطنية ، وتر الأمان ، وتر الدين ، ....... )

لغاية إمتى هنسلم روحنا للى صوابعه بتلعب أحسن .. للى يعرف يعمل خليط نغمات من الأوتار دى تكيف ودانا

أغلب المرشحين دلوقت بيعزفوا على الأوتار دى بحرفية شديدة بس المفروض إن الشعب بقى سميع قديم ويعرف يميز إن الاوتار دى مش مظبوطة من الأساس والنغمات اللى طالعة منها نشاذ قوى ... لكن مع الأسف لسه بنسمعها ونتكيف بيها

بنستمتع باللى بيعزف على الوتر بكيس رز وإزازة زيت

بنستمتع باللى بيعزف على الوتر بكلام عن تطوير التعليم

بنستمتع باللى بيعزف على الوتر بكلمتين حلوين فى حق المرأة على كام إستنكار وشجب وتنديد بالتحرش الجنسى والمستوى الأخلاقى المنحدر اللى وصلناله

و فيه ناس بتحب تعزف على وتر إسمه الغرب الكافر وإسرائيل وأمريكا .. مع إنه عايش فى خير الغرب ده

وطبعا وتر الدين دا ممكن نقول فيه كلام للصبح .. وبقينا علشان نعمل أى حاجة لازم نقول (الدين بيقول إييييييه ؟ ) ... انا عن نفسى زهقت من كتر ما بأسمع المرشحين اللى بيقولوا إن النائب هيبقى مسيحى ، انا إستفدت إيه لما النائب يبقى مسيحى ، لسه زى ما أنا تعليمى بايظ ومستشفياتى بايظة و..و..و..

وإحنا داخلين على الإنتخابات لىّ طلب أخير من كل شخص سميع ... كفاياك ودان وإشتغل شوية بعنيك وعقلك

إقرا وفكر وحدد و B+ :)