فلوس ... ثروة ... مستقبل

- بص يا سيدى .. إنت كل ما هتجيب ناس تانى هتاخد فلوس أكتر ونسبتك هتكتر

- ياعم فلوس داخلة جيبك وإنت مش تعبان ... فيه أحسن من كده ؟؟؟

- يا باشا كل اللى بيقولوا كده دول عبايط ومش فاهمين .. الشركة معتمدة وزى الفل

- انا أعرف واحد كان بيستلف منى فلوس .. دلوقت معاه عربية و Iphone وبيشطب الشقة بتاعته ..

  وكل ده فى أقل من سنة

- يا سيدى إنت مش خسران حاجة ولو بعد ما لميت فلوسك العملية طلعت نصب إنت كده فى الأمان ومش مضرور فى حاجة

الجمل دى كلها سمعتها من أشخاص مختلفين كانوا مُصِرين إنهم يقنعونى بالهبل اللى إسمه تسويق شبكى .. والحاجة المشتركة بينهم هى الكسل والتفكير السلبى الطماع ، اللى عايز يكسب كتير بأقل مجهود وبأى طريقة ... ناس كتير شغالين فى التسويق الشبكى وخصوصا من الشباب اللى فى سن ثانوى وجامعة ... طيب إشمعنى ؟؟؟

ببساطة لأن الناس اللى عاملة الشركات دى بتلعب على وتر الحلم والمستقبل .. وإنك تشتغل شغلانة مريحة جدا ومع ذلك تكسب دهب منها وتبتدى تحقق أحلامك ... السؤال بتاعى هو " يعنى إيه تسويق ؟؟ وإيه المنتج اللى الناس دى بتسوقه ؟؟ "

الإجابة .... التسويق هو إنك تعرض المنتج بتاعك على الزبون وتحاول تقنعه بيه وبمزاياه ولما بيشتريه إنت بتاخد نسبة من الشركة  والزبون تنتهى علاقته بيك وبالشركة ... لكن الحقيقة اللى بتحصل غير كده .. اللى بيحصل إن هدفك مش إنك تبيع المنتج على قد ما إنك تجيب ناس شاطرين إنهم يجيبوا غيرك علشان الشبكة (الهرم) اللى تحتيك يكبر ونسبتك تعلى ... يعنى ببساطة إجابة السؤال التانى هو " إنت بتتاجر فى البنى آدمين "

هى الساعة اللى ب 600 فعلا قيمتها كده ؟؟ .... لأ

هو فيه كورس فى الدنيا يبقى تمنه 40 جنيه ؟؟؟ .... لأ

هو فيه موقع فى الدنيا ممكن يديك فلوس لله وللوطن لمجرد إنك عملت account  عليه ؟؟ .... لأ

والسؤال اللى محيرنى ... إيه سر ظهور كل الناس ذات القلوب الرحيمة اللى متطوعين إنهم يدفعوا مبالغ لكل شباب العالم علشان يبقوا مبسوطين ويأمنوا مستقبلهم بالسهولة دى ( الدنيا لسه فيها خير )

يا شباب فوقوا وإصحوا للخدعة الكبيرة

بعد وقت وكل ما الفلوس تكتر الطمع هيزيد وشعاركم هيبقى ( البحر يحب الزيادة ) .. إلحقوا نفسكم بدل ما تدخلوا فى دوامة الفلوس والثروة وتكتشفوا إنكم بقيتوا عبيد للقرش ... ومستعدين تعملوا أى حاجة فى سبيل إنكم تكسبوا

مش غلط إنك تشتغل علشان تجيب فلوس ... لكن الغلط هو نوع الشغل

الفلوس دى علشان نعيش بيها مش نعيش علشانها

انا عارف إن ناس كتير ممكن تقول علىّ عبيط علشان بأقول الكلام ده ... لكن كلمة فى سرك  " انا عندى العبط أحسن من بيع نفسى وأحلامى لتجار الأحلام "

وخليك فاكر إن الحكيم قالها زمان

ِ" غِنَى الْبُطْلِ يَقِلُّ، وَالْجَامِعُ بِيَدِهِ يَزْدَادُ "

" ذُو الْعَيْنِ الشِّرِّيرَةِ يَعْجَلُ إِلَى الْغِنَى، وَلاَ يَعْلَمُ أَنَّ الْفَقْرَ يَأْتِيهِ "

ماتسيبش أحلامك لتجار الحلام يلعبوا بيها وبيك و +B :)