Facebook Market

عيشت سنة فى القاهرة كانت جميلة جدا بس كانت مكلفة جدا جدا وخصوصا لما كنت بأدخل اى هايبر ماركت ( أولاد رجب ، كارفور ، خير زمان ، ... ) كان فيه هناك عربية جميلة جدا تزقها قدامك وتحط فيها كل حاجة إنت عايزها وإنت بتتمشى بين اشكال والوان المنتجات المختلفة وتيجى فى الآخر عند الكاشير تلاقى واحد بيحطلك كل الحاجات دى فى أكياس علشان ماتتعبش


واضح إنى إبتديت أرغى كتير .... علشان ما أطولش عليكم فى قصتى مع الهايبر ماركت عايز أقول على حاجة بإختصار وهى إنى إكتشفت إن الفيس بوك هو كمان هايبر ماركت ... !!!!!!!!!

لما بأفتكر العربية دى بأفتكر إنها كانت دايما تدينا إحساس إننا لسه ماجيبناش حاجة وهى لسه فاضية وممكن نحط فيها حاجات كتيرة وكبيرة ... زى الفيس بوك بالظبط ، طول ما أنا موجود وبأتمشى بين البروفايلات والجروبات بالاقى منتجات كتييييييييييير منها اللى يستاهل أقف قدامه ومنها اللى مايستاهلش لأنى مش محتاجه أصلا ... وبأكتشف فى الآخر إنى ماتعبتش وانا باحط كل حاجة فى العربية (دماغى) ولا تعبت لما وديتهم للكاشير ... بس تعبت جدا لما إكتشفت إن الحاجات دى تمنها غالى قوى وانا بادفع للكاشير وتعبت أكتر وأنا شايل الأكياس التقيلة اللى مليانة حاجات انا مش محتاجها

السؤال المهم هو : ياترى إنت بتعمل وتاخد اللى إنت محتاجه بس ولا إنت ماشى تحط أى حاجة وخلاص ؟؟؟؟؟

خلى بالك إن كل حاجة مالهاش لازمة إنت بتحطها فى دماغك بتكلفك فى الآخر ... بتكلفك وقت كان ممكن تعمل فيه حاجة مفيدة وبتكلفك نفسك لأنك بتكتشف إنك بقيت زبادى خلاط بعد كوكتيل الحاجات اللى مالهاش دعوة ببعض اللى دخلوا دماغك

نفسك تكون إيجابى وتفيد اللى حواليك ؟؟؟
وفّر طاقتك ودماغك فى حاجة مفيدة وبلاش تملاها حاجات مالهاش لازمة .. وإملاها بالمفيد اللى هيفيدك

 إختار اللى هتشتريه و  +B  :)