ببساطة لو سألت أى واحد " الله موجود وقادر على كل
شئ ؟؟؟ " يقول " طبعا .. إيه السؤال العبيط ده "دى الإجابة الطبيعية .. ماحدش هيقول إن الله مش موجود غير الملحد اللى واضح من البداية فى مبادئه ... لكن المشكلة إن الناس اللى بتقول إن الله موجود بينكروه بس بطريقة غير مباشرة ...... إزاى ؟؟؟
لو إنت واثق إن الله
غير محدود وعارف المستقبل .. ليه خايف من المستقبل ؟؟
لو إنت واثق إن الله بيحبك محبة غير مشروطة وغير محدودة
.. ليه بتعانى من إحساسك بعدم الحب ؟؟
لو إنت واثق إن الله هو اللى بيرعاك ويحافظ عليك .. ليه
دايما قلقان من الظروف ومن اللى ممكن يحصل فجأة ؟؟
لو إنت واثق إن الله هو اللى بيرتب رزقك .. ليه خايف
ومرعوب من الأزمات الإقتصادية ؟؟
لو إنت واثق إن الله هو أصل الحياة .. ليه عايشها بعيد
عنه ؟؟ ( ولو إنت بعيد عن أصل الحياة تبقى مش عايشها أصلا )
لو إنت واثق إن الله عظيم .. ليه بتتساهل فى إنك تنطق
إسمه فى حلفان باطل أو تكرره من غير لازمة ؟؟
لو إنت واثق إن الله قدوس .. ليه بتتساهل مع عدم قداستك
وبتبررها بمحدوديتك و عجزك البشرى ؟؟
لو إنت واثق إن الله عادل .. ليه بتتمرد على ظروفك ووضعك
ودايما طمعان فى الأفضل ؟؟
لو إنت واثق إن الله رحيم .. ليه دايما حاسس إن كل اللى
بيعمله هو إنه يشوفك إنت غلطت فى إيه ويعاقبك عليه ؟؟
لو إنت واثق إن الله غفور .. ليه بتتردد إنك ترجعله
وتتوب ليه لما تعمل الغلط ؟؟
وغيرها كتير من الأسئلة اللى لو فكرنا فيها هنلاقى إن إحنا نظريا مؤمنين بوجود الله لكن عمليا إحنا منكرينه
يعنى مثلا لو إتكلمنا على آخر سؤال .. لو إنت خايف تتوب وترجع لربنا علشان خايف من عقابه .. تبقى مش بتثق فى مغفرته وبالتالى إنت مش بتثق فيه
إيه ده ؟؟ هو الموضوع كبير قوى كده ؟؟؟ ..... اه
لو عايزين نعيش الحياة صح خلينا قريبين من أصل الحياة ... بس قريبين بجد وبلاش نكرر كلام الكنايس والجوامع اللى كلنا حافظينه بس للأسف فيه كتير منه مش عايشينه
تعالوا نعيش مع ربنا مش نعيش بنتعلم ونقرا ونسمع عنه
تعليقات
إرسال تعليق