مشكلة المشاكل

-   المشكلة إنه مافيش مشكلة لأننا لو قولنا إن فيه مشكلة هاتبقى مشكلة لكن طول ما مافيش مشكلة يبقى هاتيجى منين المشكلة

-   كل ما نلاقى مشكلة تطلع مش مشكلة ولو مالقيناش مشكلة نقول إحنا فى مشكلة والمشكلة إننا مش لاقيين المشكلة اللى تستحق إننا نقول عليها مشكلة لكن مجرد إننا لقينا مشكلة قولنا إنها مشكلة ودا اللى خلاها مشكلة

هو إيه الموضوع ؟؟؟

شئ بديهى .. إن أى حد قدامه حاجة صعبة أو موضوع معقد بنقول عليه مشكلة وبنحاول نلاقيلها حل أو أحيانا بنستسلم .... اللى غايظنى بقى فى الموضوع ده - وأكيد فيكم ناس متغاظة معايا - إن فيه ناس كتير دلوقت بقيت غاوية مشاكل وكل ما تشوف حد يفضل يشكيلك من مشاكله ( طيب أنا مالى) واللى يغيظك أكتر إن المشكلة تلاقيها تافهه وتحاول - كرد فعل طبيعى علشان تحسسه إنك مهتم – إنك تساعده وتقدمله حلول لكن هو مش مقتنع خااااااااالص
 

تعالوا نفكر شوية ....

ليه بقينا حابين العيشة بتاعة الحزن والشكوى والمشاكل .. ولو ماعندناش مشاكل ندور على مشاكل .. لو لقينا مشكلة صغيرة جدا جدا جدا نكبرها ونعمل إنها أصعب من القضية الفلسطينية .... ولو مالقيناش تبقى مشكلة كبيرة إننا مش لاقيين مشكلة تخلينا نزعل

" وكأنه غلط إننا نقعد فى راحة بال ونقعد من غير ما نشتكى ونرسم ال 111 "

يا جماعة الله خلقنا مش علشان نزعل ونقعد الوقت كله حابسين نفسنا جوه برطمان مشاكلى ومقفول علىَ ومش راضى أطلع من جوه

الله خلقنى علشان أستمتع بالحياة اللى إدهانى - بس أستمتع بيها بطريقة صح - مش علشان أضيعها فى حزن وكلام فاضى

وبناء على الكلام اللى قولناه ده يبقى لما تكون عندى مشكلة فعلا وحاجة أنا محتار فيها بدل ما أحطها قدامى وأفضل أبكى وكأن البكا هايخلينى أصعب عليها فتحل نفسها

إيه رأيكم لو كل واحد عنده مشكلة حطها قدام ربنا ... وربنا - اللى إدانى الحياة دى علشان أستمتع بيها وأستمتع بيه فيها - هو اللى يتصرف فى المشكلة دى

فكر فيها و +B :)