شوية تعب

شئ بديهى .. إنك لو عايز تدخل أى مكان بتدخل من الباب اللى هو المدخل بتاع المكان ده ... ولو نطيت من السور أو دخلت من شباك يبقى إنت كده بتتسلل وبيعتبروك داخل دخلة حرامية 

بصراحة بقى الموضوع دا غايظنى جدا جدا جدا جدا ... ليه ماحدش دلوقت عايز يدخل من الباب ليه كل الناس دايما بتفكر فى الأسهل والأقصر .... لو فيه سور بيفصل بين منطقة ومنطقة لازم يكون فيه معبر أو باب نعدى منه للناحية التانية ... دا حتى السجن فيه باب فى السور . امال إيه الحكاية ؟؟؟؟؟

 

دلوقت لما تيجى تكلم حد عن أى تحدى فى حياته يقولك : ما أعرفش ، أصل أنا ماليش فى الموضوع ده ، أصل أنا ماجربتش ، أصل أنا مش عارف تتعمل إزاى ، أصلها صعبة ، حاولت كتير و ماعرفتش

وكل ده لأننا مش بندور على الباب .. لكن كل هدفنا إننا نعدى وخلاص وكل ما نحاول نخبط فى السور ....  مش عايزين نتعب فى البداية علشان نلاقى الباب وبعد كده هنلاقى الموضوع سهل لأننا عدينا وبقينا فى المكان المظبوط بالطريقة المظبوطة  

الحماسة تقولك هد السور ونط من فوق كل حواجز ... لكن العقل يقول طيب ما أنا أدور على المكان المظبوط اللى أعدى منه

خلاصة الكلام علشان انا رغّاى :)

 لو عايز تعرف هدفك أو قدامك حاجة صعبة بس إنت عايز تعملها أوعى تخبط فى الحيطة كتير علشان ما تتعورش على الفاضى ، لكن دور على الباب فين وإبدأ مشوارك بعد ما تعدى السور وخليك فاكر إن كل سور أكيد هتلاقى فيه باب أو فتحة منفذ للناحية التانية

الله دايما بيكافئ اللى بيتعب وبيفتحله الأبواب .. والحلو فى الحكاية دى إن ربك لما يفتحها ياخى ماحدش يعرف يسدها :)

خليك فاكر جملة قالها واحد حكيم

العامل بيد رخوة يفتقر .. ويد المجتهدين تغتنى

إتعب و +B :)