صباح الخير .... وعليكم السلام

فيه ظاهرة منتشرة جدا جدا الأيام دى بين المسيحيين والمسلمين وهى الكلمات المميزة أو الكلمات المفتاحية

يعنى لما تبقى قاعد فى أى مكان وسمعت واحد وراك بيقول : "السلام عليكم" تعرف على طول إنه مسلم ولو إنت مسيحى تبدأ تاخد بالك فى التعامل معاه وتبدأ النظارات اللى من تحت لتحت وتفتكر جواك كل الكنايس اللى إتحرقت والأديرة اللى إتكسرت وتفتكر كل كلام الشيوخ المسلمين المعتدلين اللى قالوا يا جماعة مش لازم السلام عليكم لكن لو قولتوا صباح الخير ينفع برضو ، وتبدأ تحاكم الشخص دا جواك وكأنه هو سبب كل الحاجات اللى إنت بتفتكرها دلوقت وتبدأ تاخد حذرك منه لأنه عدو أو يدور جواك فيلم عربى بإنه هيطلع السكينة دلوقت ويقيم عليك الحد

ولو إنت مسلم وقاعد على نفس الكرسى وسمعت واحد وراك بيقول : " صباح الخير " تعرف على طول إنه مسيحى ولأنه ماقالش تحية الإسلام تبدأ تاخد خطوات عكسية ضده أولها إنك هتحتقره ومش هترد عليه ، أو بكل بواخة هترد تقوله : " وعليكم السلام" وكأنه كان عايز يضحك عليك ويعملك غسيل مخ ويخليك تقول صباح النور ، بس إنت وااااااااعى

دا بالنسبة لبداية الحديث لكن طبعا لسه فيه شوية كلمات مفتاحية كتير (ربنا يباركك ، بارك الله فيك) (شكرا ، جزاك الله كل خير ) وغيرها من الجمل اللى ليها نفس المعنى بس مش نفس الإسلوب والأولى تعرف إنه مسيحى والتانية تعرف إنه مسلم

هو إيه الحكاية ؟؟؟ إحنا فاضلنا شوية كمان وهنحتاج قاموس (مسلم – مسيحى ، مسيحى – مسلم) علشان نعرف نتعامل مع بعض

ما إحنا طول عمرنا بنقول صباح الخير والسلام عليكم من غير ما حد ياخد باله وكل واحد زى ما متعود .. والخير والسلام حاجتين كويسين صدقونى مش وحشين

ليه بقى فيه سور مبنى من كلام ومصطلحات خلى سهل قوى إننا نخسر بعض وإننا نفكر بسلبية ناحية بعض و خلى حكاية الفتنة دى سهلة جدا جدا لأننا من غير ما نحس بقى عندنا شعور بالتفرقة وإننا فريقين ضد بعض

بأحلم إن الناس لما تتكلم مش تقول مصطلحات معينة علشان يظهروا ديانتهم لكن يقولوها لأنهم متعودين على كده ... لو أنا متعود أقول صباح الخير هاقول صباح الخير لكن لو حد قالى السلام عليكم هاقوله وعليكم السلام

يمكن ناس تشوف إن موضوع مسلم ومسيحى دا موضوع مش هيتحل .. بس أنا هابتدى أدور على العقد اللى أقدر أفكها وأفكها ........... أنا هاقبل غيرى 

وإنت كمان إقبل اللى قدامك و +B  :)