حكاية إنهاردة قديمة بس لما إفتكرتها
لقيت إنها تنفع اليومين دول ... الحكاية دى حصلت معايا ومع أصحابى القريبين
الحكاية كالتالى
فى يوم من الأيام وإحنا قاعدين مع بعض حوالى 10 أو 15 نفر ... إبتدينا نفكر ليه مانعملش طايفة خاصة بينا أو حزب
طيب الموضوع دا محتاج إييييييييييه
؟؟؟
1- رئيس للطايفة أو الحزب : موجود وعندنا
واحد ينفع
2- واحد يبقى مسئول عن الإعلام والميديا
الخاصة بينا : عندنا بدل الواحد إتنين وتلاتة وأربعة لو حبينا
3- واحد يبقى بتاع الأغانى بتاعتنا بقى واللى
يمسك المزيكا من أولها لآخرها : برضو متوفر والحمدلله
4- واحد يمسك الماليات و ميزانية الحزب :
موجود يا باشا
5- الرعاية والإهتمام بأفراد الحزب نفر نفر :
عندنا واحد بيحب كده جدا جدا جدا
6- الكتابات بقى ونشر فكر الحزب : موجووووود
.. هنغرق السوق بأفكارنا
7- التمويل : ماعندناش أى مشاكل نمول إحنا
الحزب ده
8- الهدف من الحزب : الإعتراض على أى حد
بيعترض علينا ( إحنا أصلا وقتها كنا مجموعة من الشباب اللى بيعترض ممكن على نفسه )
وغيره وغيره وغيره
المهم إننا قعدنا وإفتكسنا الفكرة دى
وخلاص راحت لحالها ولما بنفتكرها بنضحك على الأفكار المجنونة بتاعتنا ... بس
إفتكرتها من كام يوم ولقيتها هتنفعنا قوى اليومين دول بس هنعملها بشكل جديدإحنا مش
هنعمل حزب كبير وليه إسم .... بس اللى جه فى دماغى إن كل واحد مننا حزب
1- إنت رئيس الحزب اللى هتتحكم فى تصرفاتك
وتتحكم فى نفسك علشان تنشر الفكر
2- الإعلام : بما إننا كلنا بايتين على الفيس
فكلنا هننشر فيديوهات ومقالات ليها لازمة تفتح العقول وتنور الأذهان على هدف ومعنى
حقيقى للحياة والمستقبل
3- الأغانى : هنقول كلامنا وعباراتنا من غير
وزن ولا قافية بس هنقول اللى جوانا ودى هتبقى أحلى أغنية
4- التمويل والماليات : كل واحد يبقى عنده
إستعداد إنه يقتصد من فلوس وجبات هارديز وبيتزا هات .. وإقتصد من فلوس الدبايب
بتاعت الفلانتاين ... وإدى واحد جعان وساعد حد فقير تبقى عارف إنه مش معاه ومش
قادر يوفر لقمة عيش لبيته
5- الرعاية : حط قدامك شخصين على الأقل إهتم
بيهم واسأل عليهم وإدعيلهم فى كل مرة بتصلى فيها
6- الكتابات : بعد دا كله إنت هتبقى كتبت
أعظم كتاب للناس .. مش هيضطروا يشتروه من المكتبات وماحدش هيعرف يصادره أو يمنع
طباعته لأنك كتبته فى قلب كل واحد قابلته
أما عن الهدف فمتهيالى بقى واضح دلوقت
هدفنا ننشر خير وسلام وعطاء
وغفران و محبة غير مشروطة و كلام كويس يشجع اللى حوالينا و أمان و نعلمهم
إزاى يفكروا ومايبقوش صندوق لأفكار الناس اللى حواليهم و الفقير مش شرط يبقى غنى
بس يتعلم يبقى شاكر ومش متذمر ويلقى اللى يكفى إحتياجاته ويتأكد إن ربنا مش
ناسيه وكل واحد يبتكر حاجة هو بيعرف يعملها ويشتغل فيها
ياللا نتوحد كلنا فى حاجة حلوة نفيد
بيها اللى حوالينا
خليك واحد من الحزب ده و +B :)
تعليقات
إرسال تعليق