الجملة دى طبعا وزى ما هو معروف إنها
الجملة السحرية لإنهاء أى علاقة بين ولد وبنت .. وغالبا بتبقى طالعة من البنت
لأنها إتجرحت من أى حاجة تافهه
دا غير إنها ممكن تطلع من الولد لو إتخنق
من البت اللى معاه وعايز يفك منها و عايز يشوف حاله مع غيرها
بس أنا لما فكرت فى الجملة دى لقيت
حاجة غريبة ....
1- إزاى بعد فترة قصيرة أو طويلة من
العلاقة الغير بريئة بينهم تبقى النهاية خلينا إخوات أحسن ؟؟؟؟
2- إزاى
بعد فترة قصيرة أو طويلة وهم مش إخوات هايرجعوا إخوات تانى ؟؟؟؟
3- ولما
هم عايزين يبقوا إخوات لأن دا أحسن ... ليه مافضلوش إخوات من الاول ؟؟؟؟
بصراحة مالقتلهاش غير تفسير واحد ..
يمكن ناس توافقنى وممكن ناس تعارضنى وممكن ناس تزعل منى لكن دا رأيى
البنت والولد دخلوا فى العلاقة أصلا
من الأول ممكن لأنهم تافهين ومش لاقين حاجة عليها القيمة يعملوها .. وممكن يكونوا
بيسدوا فراغ معين فى حياتهم
.. وممكن
يكونوا بيعملوا كده من كتر الشحن العاطفى ليهم من الأغانى والأفلام والحاجات
الهابطة دى
لكن اللى أنا متأكد منه حاجة واحدة
........ إن الجملة دى بتعقد الأمور أكتر مش بتحلها
مافيش حاجة إسمها خلينا إخوات ، يعنى
بإختصار ماينفعش واحدة كنت ماشى معاها بقالى فترة وبعدين فجأة أحترمها وأعتبرها زى
أختى .. يبقى إحنا كده بنلعب بالنار
علشان مهما عملنا مش هانقدر نرجع إخوات لكن ممكن نرجع عمر وسلمى( البديل العصرى
لروميو وجوليت ) ... ما علينا
إيه رأيكم يا شباب نتغير ونكبر ونبقى
حاجة عليها القيمة بدل التفاهه دى
.. بدل إحنا
مش بنستفيد حاجة من العلاقات النص الكم دى ما تسيبنا منها خالص
تعالوا نخاف على مشاعر بعض ، نخاف على
مشاعرنا إحنا ، نخاف من النهاية الحزينة ، نخاف لحسن نقع فى فخ
العلاقات الهايفة ، نخاف لحسن نكون عايشين فى كدبة كبييييييييرة والعبيط اللى
فيها هو إحنا ، تعالوا نخاف و نحسبها صح
وخلينا من الاول إخوات أحسن و +B :)
تعليقات
إرسال تعليق