محتاجة واحد جرئ

من السنة اللى فاتت وأنا متردد أقول ولا لأ .. أكتب ولا أكبر دماغى ... أشارك ولا أحتفظ بالحاجة لنفسى ........ خلال الفترة دى فضلت أسمع كلام كتير زى

---

- الزلطة لما ترميها فى الميه هتلاقيها عملت شوية دواير حوالين نفسها ، بس الدواير دى بتبتدى من حواليها وتبتدى توسع توسع توسع لغاية لما توصل لأقصى حاجة ممكن توصلها

 

-  المفروض كل واحد فينا يقوم بثورة لوحده بس مش ثورة ضد نظام الحكم فى البلد ولا ضد الفساد اللى فى البلد لكن ضد نظام التفكير بتاعنا وضد الفساد الأخلاقى الموجود عندنا 

- لو عايزين البلد تتغير وعايزين أحوالنا تتغير ، لازم نبدأ بنفسنا ودواير التغيير تبدأ من عندنا زى الزلطة بالظبط  

- مش هنقول عايزين البلد تبقى بمبى على رأى سعاد حسنى غير لما نمسك إحنا الألوان ونلونها بمبى

- يااااااااااااااااه ... ياخى الكلمتين دول حاسس إنى سمعتهم فى 100 برنامج حوارى عن التغيير و1000 فيلم عربى من بتوع الجاسوسية و الأكشن .. ومع ذلك لسه مش حاسين إن فيه حاجة حقيقية بتتعمل

فين المشكلة ؟؟؟؟؟؟

المشكلة إننا بنقول فى كلام عن التغيير و ننقاش القضية و لما نلاقى واحد طلع بفكرة جميلة كلنا نقعد نصقفله ونقول الراجل دا زى الفل ، هو دا الكلام ... بس قليلين اللى بيتحركوا

الناس اللى نزلت فى الميدان فى بداية الثورة قالوا عليهم مجانين ... لأنهم عملوا حاجة الناس كانت بتكتفى إنها تتكلم عنها فى البيوت وبصوت واطى ( علشان الحيطان ليها ودان ) ... لكن هم قرروا ياخدوا خطوة وينزلوا الميدان ويكملوا واللى كان قاعد فى بيتهم إتشجع بيهم ونزل معاهم


مش كفاية إن يبقى جواك حلم أو فكرة ....... الحكاية محتاجة واحد جرئ

إتحرك و ( خليك إيجابى +B )