الإمتحان دا مختلف فى النظام بتاعه .
كله اسئلة إجبارية (بس لو مش عايز تحل مافيش مشكلة) .
وكمان مش هتكتب إجاباتك علشان دى حاجة خاصة بيك (بس لو عايز تكتب وتشاركنا باللى فى دماغك أو برأيك برضو مافيش مشلكة)
ياللا كله يركز علشان هاوزع ورقة الأسئلة ......
- ليه بتقنع نفسك إنك حزين وإنك متضايق ومكتئب .. مع إنك ممكن تكون مش كده بس إنت مبسوط بكلام الناس وهى بتشجعك ولمتهم حواليك ويمكن تكون مبسوط بالوضع ده وحاسس إنه مستريح لأنك خايف تفرح ؟؟؟
- ليه عايش خايف من كل الناس حتى من نفسك ؟؟
- ليه عايش مش مقتنع إنك أحسن من ناس كتير وإن وضعك المادى اللى إنت مش راضى بيه ناس كتير تتمناه ؟؟؟
- ليه عايش ومستغرب لما تسمع كلمة " أشكر ربنا " وكأن فعلا مافيش حاجة واحدة حتى لو كانت تافهة ينفع تشكر عليها (مع إن ربنا مش بيعمل حاجة تافهه) ؟؟؟
- ليه عايش تتخبط وتقلد فى كل شخص شوية علشان تعجب الناس اللى حواليك ؟؟؟
- ليه هدفك فى الحياة تافه لدرجة إنك مش عارف إذا كنت حققته ولا لأ ؟؟؟
- ليه عايش متعذب بين إنك تعمل اللى بيقول عليه ربنا وبين اللى بيقول عليه شلة الأنس ؟؟؟
- ليه سايب نفسك للظروف وزى ما الموجة توديك ؟؟؟
- ليه راضى تعيش عيشة ذل (للسجاير أو للشهوات أو ... أو .. ) وإنت ليك عيشة الملوك (دا فى حالة إنك تتحرر من اللى فات) ؟؟؟
- ليه عايز تعيش ؟؟؟
- ليه عايش بكذا وش لغاية لما وشك الحقيقى بقى باهت قوى ؟؟؟
- ليه تعيش مستنى لحظة فرحة وسعادة وأمان .. وإنت ممكن تعيش عمرك كله كده ؟؟؟
- ليه شايف مشاكلك كبيرة مع إنك إنت اللى بتبص من نظارة معظمة ؟؟؟
الأسئلة دى حاولنا نغطى بيها منهج الحياة كله على قد ما نقدر :) ...... جاوب على اللى تحس إنه يخصك
خليك صريح مع نفسك و +B :)
تعليقات
إرسال تعليق